Sërbi-Shqipëri nuk do të luhet në Beograd, reagon Vuçiç: Më mirë për kombëtaren

Presidenti i Serbisë, Aleksandar Vuçiç, ka konfirmuar se ndeshja kualifikuese e Botërorit mes Serbisë dhe Shqipërisë nuk do të zhvillohet në Beograd, por në qytetin e Leskovcit. Duke folur në një intervistë për televizionin “Informer”, kreu i shtetit serb u shpreh se ky ndryshim është i nevojshëm për shkak të atmosferës së krijuar në stadiumin “Rajko Mitić” gjatë përballjes me Anglinë, e cila përfundoi me rezultatin 0:5.

Vuçiç kritikoi ashpër publikun në Beograd, duke thënë se tifozët nuk e mbështesin kombëtaren dhe shpesh reagojnë në mënyrë negative.

“Aty tifozët nuk e duan kombëtaren dhe e pamë të gjithë se çfarë ndodhi në tribunë dhe në fushë. Në Leskovac atmosfera është krejt tjetër, njerëzit e duan kombëtaren dhe janë të gatshëm ta mbështesin me gjithë zemër,” deklaroi ai, duke shtuar se mbetet e paqartë nëse do të ketë tifozë në shkallë, pasi UEFA dhe FIFA mund të vendosin dënime pas incidenteve të ndodhura kundër Anglisë.